NTU 1 TSIM TSAA MOOB LUB NEEJ

NTU 1 TSIM TSA MOOB LUB NEEJ ( Tsim noob qoob noob loo )

Qeb 1:   TSIM TUG TXHIB NTAWG ( Xwm kab, Tug coj kev )
" Zoo le nwg nuav ces ntuj nkig teb hav cam sis vog nub txheej tshoj thaum ub ces raug tau lub ntuj lug txoos tsim tau tub nraug lab ( tub lab siv yig xeem xais ) le koj cev lug moog nyob. Cag nwg nuav ces yog tau nub txheej tshoj thaum ub zaj nab peb hlis tshav, zaj luav peb hlis cua. Cag nplaj teb nuav ces ntuj qhuav lis qhawv txug xya naj teb qhuav lis qho txug xya xyoo. Noob xyoob tuag tu caj noob ntoo tuag tu ceg ( noob moob ) Nplaj teb dlo qas cuas lug xya naj nplaj nrag dlo qas dlus lug xya xyoo. Nkauj ab nraug oo tas nyob twg le txawm noob xyoob ? Cav twg le txawm tau noob ntoo ? Cav tas noob xyoob txawm nyob peg ntxwj nyoog qab cooj qab. Noob ntoo nyob peg qab nkauj npuas. Zoo le nwg nuav nkauj ab hab nraug oo tas caag tub txib los tsis muaj. Tub khaiv los tsis tau yuav tso leej twg moog muab noob xyoob nkawm twg moog muab noob ntoo ? Cav tas yuav tso nkauj puj tseeg lis tseev moog muab noob xyoob peg ntxwj nyoog qaab cooj qab. Tso puj tseeg lis tseev moog muab noob ntoo peg ntxwj nyoog qaab nkauj npuas. Puj tseeg lis tseev ya plho moog ntsib ntxwj nyoog nkawm tub yug nyuj, ua cav ntxwj nyoog nkawm tub yug nyuj has tas ua cav txhua naj koj tsis ntuj caag txhua xyoo koj tsis tsiv xyoo nuav koj yuav tuaj moog tug tsi ? Puj tseeg lis tseev has tas nplaj teb peb hlis tshaav zaj luav peb hlis cua. Noob xyoob ces tuag tu caj noob ntoo ces tuag moog tu ceg. Ntuj dlo lis cuas lug xya naj teb dlo lis dlug lug xya xyoo. Zag nuav yog lawm nkauj ab hab nraug oo tso kuv tuaj moog muab noob xyoob peg ntxwj nyoog qaab cooj qab. moog muab noob ntoo peg ntxwj nyoog qaab nkauj npuas. Noob xyoob muaj los tsis muaj noob ntoo tshuav los tsis tshuav ? Ua cav ntxwj nyoog nkawm tub yug nyuj has tas noob xyoob tshuav lawm naj peb tuab re noob ntoo tshuav lawm naj peb tuab rau. Puj tseeg lis tseev ya plho moog txug peg ntxwj nyoog qaab cooj qab. Tsuab zoj noob xyoob naj ib teg re nqa lis ncuv tuaj ntawm ncauj, muab zoj noob ntoo tuaj ib teg rau nqa lis ncuv tuaj ntawm taw. Puj tseeg lis tseev yaa plho rov lug txug nplaj teb. Nkauj ab nraug oo tas puj tseeg lis tseev koj muab noob xyoob hua lis hawv tuaj nruab roob muab noob ntoo hua lis hawv tuaj nruab ha. Cav nwg nuav ib hlis peb caug nyoog ua cav noob xyoob moog ua kaug poob noob ntoo moog ua kaug hlaav. Ua cav noob xyoob tuaj lawm naj peb tuab tug noob ntoo tuaj lawm naj peb tuab tsob. 
Nwg nuav noob xyoob hlub tav txuj, muaj ib tug yog nag kus tug. Muaj ib tug ca hlub moog tav ci, puj maab yawm sua dlua kaab puj maab yawm sua txav coj moog hab vaab. Muaj ib tug ca txawj nkag nqeg tuaj txug tub txawg nqeg tuaj poob. Muab txav lis nrawg naj ob tog txhij phua plhawv tuaj nruab nraab muab ua lawm tub tuaj tug cwj moog qhuab kaab. Zoo le nwg nuav muab cwj qhuab kaab phua lis plhawv tuaj plaub ceg muab ua lawm puj saub tug cwj nqeg qha tub tuaj kev. Yuav muab ntaus ndlag rua koj leej tub tej npoo ncoo. Yog ob saab qheb ces yog lawm neej tsug yog ob saab khwb ces yog lawm dlaab tsug. Yog ib saab qheb ib saab khwb ces yog lawm neej dlaab chaw sib txuas lug nua nas.
Qhov nuav ces yog ib qeb, ntawm nuav ces yog tag ib quag koj txais koj txhaj tau nua tov ! "

PEEM KEV TXOM NYEM, YUAV KEV TAU ZOO
" Nyob rau hauv lub ntiaj teb no nws tseem tshuav muaj ntau yam heev uas peb tib neeg ntiaj teb tseem paub tsis tau txog qhov tseeb hlo li "
 
Nyob rau hauv lub zos vaj loog tsua teb chaws thaib, muaj ib hmos kuv tau taws tswm ciab paj ntoos thiab hlawv xyab thov hawm txog rau cov tswv ntuj tswv teb los yog cov ua niam ua txiv ntuj tias...yog hais tias nej sawv daws yeej muaj nyob saib peb tib neeg ntiaj teb tiag tiag no ces thov kom hmo no nej los ua npau suav rau kuv tau paub thiab tau pom no. Ces hmo ntawd kuv pw mus txog rau ib tag hmo nkaus ces lawv txawm los ua npau suav rau kuv thiab tau coj kuv mus rau hauv ib lub qhov tsua. Nyob rau hauv lub qhov tsua ntawd mas nws zoo nkauj heev li, nws muaj ib lub txaj pob zeb uas ci tau zoo nkauj heev. Kuv tau pom niam luam meb los yog niam nkauj ntsuab nws zaum nyob rau ntawm lub txaj pob zeb ntawd, ces kuv tau txav mus nyob ze rau ntawm ib sab npoo txaj ces niam nkauj ntsuab nws thiaj li los puag nkaus kuv ces wb thiaj li tau sib qawg quaj, sib qawg quaj tas ces nws tau muab li ib phoov tes hmoov qos ntoo dawb dawb zoo li cov mov kuam hmoob thaum ub ntawd coj los cev rau kuv noj. Ces kuv tau txais coj los noj noj tas li ib nrab xwb ces kuv cia li muab pov tseg lawm. Ces niam nkauj ntsuab nws tau nug kuv hais tias...nej nyob rau hauv vaj loog tsua es nej nyob zoo li cas xwb?
Kuv tseem tsis tau teb nws cov lus rau nws, ces kuv saib na has cas pom cov pob zeb nyob rau tim ib phab tsua ntawd nws txawm ua zog zom zaws, ces txawm tawm plaws ib tug tib neeg ntoo ib lub kaus mom zuag zuag uas zoo li tej mlom ntoo ntawd. Ces nws txawm los teb rau kuv hais tias koj puas xav paub txog qhov uas nej nyob rau hauv vaj loog tsua ntawd kuv mam li qhia rau koj, thiab nws tau hais rau kuv hais tias ua tsaug txog rau ntawm kuv uas kuv tau xa ib cov nyiaj mus rau nws no. Ces kuv txawm xav hauv siab tias Ab! kuv twb tsis tau xa dab tsi mus rau nws li na no. Nws thiaj li tau coj kuv tawm plaws hauv lub qhov tsua ntawd los mus rau sab nraum no uas yog lub vaj loog tsua uas peb nyob ntawd. Nyob rau lub tshav puam ntawd nws tsuas pom muaj nroj tsuag nkaus lawm xwb tsis pom muaj ib lub tsev li lawm. Ces peb txawm los mus zaum sib tham rau ntawm lub tshav puam ntawd  ces txawm pom lawv muaj li peb plaub leeg los nrog kuv zaum ua ke vij ncig ua ib lub vauj voos, ces lawv txawm muab tau ib tug pas coj los mus kos hauv av ua ib lub vauj voos. Ces thaum uas peb zaum nyob ua ke es lawv muab tug pas los mus kos ua lub vauj voos rau hauv av ntawd lawv tsis pub kuv hnov lawv cov lus li lawm. Lawv yeej tham hais lus tab sis cas kuv tsis hnov lawv lub suab li lawm, zaum nyob ua ke xwb tab sis tsis hnov li lawm. Ces tag nrho qhov ntawd ces kuv sawv los mus tsa qhov muag saib ces txawm pom lawv muaj li 3 leeg sawv ua ib txig nyob rau saum ib nta ntuj lawm xwb. Ces kuv thiaj li tau tsim dheev los lawm. Qhov no kuv tus kheej paub zoo tias nws zoo tsis thooj li tej npau suav txhua txhua zaug, vim yog kuv tau thov hais tias yog cov ua niam ua txiv ntuj muaj tseeb tiag raws li txoj kev ntseeg no ces kom los qhia rau kuv paub no es lawv thiaj li tau los hais qhia ua rau kuv tau pom hauv npau suav li ntawd.
Muaj ib hmos nws kuj yog nyob rau hauv vaj loog tsua ntawd thiab lawv kuj rov qab los ua rau kuv pom dua. Kuv tau pom muaj 2 tug zaj liab, nws cov ib thiab cov nplai ntawd liab liab zoo nkauj heev. Nws ya sab laug los mus rau sab xis uas nws yog nyob rau pem cov hauv tsua, nws ya los mus ces muaj ib tug ces nws txawm ya ua ntej mus dhau lawm hos muaj ib tug ces nws txawm ya los mus rau ntawm kuv. Ces thaum uas nws ya nqis los mus rau ntawm kuv, ces thaum nws nqis los poob kiag rau hauv av ces nws txawm cia li yog ib tug tib neeg lawm. Ces nws tau los rau ntawm kuv, kuv zaum nyob rau ntawm ib lub rooj sau ntawv ces nws los txog rau ntawm kuv nws muab tau ib daim nyiaj 20 npaj coj los tso rau ntawm kuv lub rooj. Ces thaum ntawd kuv tau quaj thiab tu siab heev thiab tau tsim los lawm xwb.
Muaj ib hnub tshav ntuj nrig nws kuj yog nyob rau hauv vaj loog tsua ib yam nkaus thiab. Hnub ntawd thaum tav su dua kuv tau pom muaj ib tauv huab dawb dawb los ua tau ib lub tsev huab tais uas zoo nkauj heev nyob rau saum cov hauv tsua. Thaum ntawd kuv kuj tau xav tias nws yog tiag los yog dag, kuv tau ua tib zoo saib zoo zoo tsis ntsais muag hlo li. Lub tsev ntawd nws yog ib lub tsev huab tais uas zoo nkauj heev, kuv saib mus ntev li 5 feeb xwb ces nws txawm cia li yaj ploj zuj zus mus lawm.
Kuv yog ib tug uas nyiam txoj kev cai hauj sam heev thiab nyiam txoj kev ua zoo heev. Yog li ntawd kuv thiaj li tau mus pab hauj sam ua hauj lwm, ua vaj ua tsev ua ub ua no nyob rau tim tsev hauj sam. Kuv txoj kev uas pab lawv ua li ntawd nws yog kuv ua raws li kuv lub siab nyiam thiab lub siab ntshaw txoj kev zoo ncaj ncees thiab kev tsim koob hmoov xwb. Kuv yeej tsis tau xav txog tias yuav ua es yuav nyiaj li, kuv ua li ntawd ib hnub no lawv tsuas muab ib leeg me ntsis zaub mov pub rau kuv tau noj xwb. Nyob ntawm tus xav muab ntau los muab tsawg xwb, nruab hnub kuv mus pab hauj sam ua hauj lwm tsaus ntuj kuv rov qab los pw rau tim zos hmoob lawm. Kuv ua li no los tau ntau xyoo ces muaj ib xyoos kuv mam li tau thov txiv luam phoj muab tau ib lub tsev rau kuv nyob ces kuv thiaj li tau tsev nyob thiab pab lawv ua hauj lwm txhua hnub li. Nyob rau ntawm qhov chaw uas kuv ua hauj lwm no nws txawm muaj ib tug maum Aub ( dev ). Tus maum Aub no tsis paub tias xyov nws los qhov twg los li thiab tsis muaj leej twg tug li. Kuv mus ua hauj lwm ces nws txawm cia li pheej caum kuv thiab lawv kuv qab tas li mus rau qhov ub qhov no li. Tus Aub no nws muaj ntau yam uas txawv heev rau kuv, thaum ntej kuv tsis tau muaj tsev nyob mas nws pheej caum kuv mus rau tim zos hmoob. Kuv muab nws lawv npaum li cas los nws yeej tsis kam khiav mus li. Thaum uas yus yuav muab nws ntaus no ces nws kuj ua ib siab nyob twj ywm saib ntsoov kuv mus mus ploj lawm no ces nws mam li rov qab mus lawm xwb. Zoo nkaus li nws paub tias yus tsis pub nws mus ces nws ua ib siab nyob, tsis paub hais tias nws yog leej twg tus Aub thiab nws mus nyob rau qhov twg li lawm? Thaum kuv tau tsev nyob lawm los nws kuj tseem los nrog kuv nyob li thiab. Muaj qee zaum nws kuj ua rau kuv txaj muag thiab xav tsis tag, kuv xav tias nws pheej nrog kuv nyob li no nyob tsam ces luag tej ho xav phem rau kuv thiab no. Tab sis kuv muab saib ces kuv kuj pab hlub thiab, muaj tej thaum kuv kuj muab nws lawv kom khiav mus tsis txhob los ntxiv lawm los nws kuj rov qab los li thiab. Thaum ntej kuv kuj lam muab tej khaub ris khaub tsho coj mus pua rau hauv qab taw ntaiv kom nws tau pw no. Tab sis nws cia li nce los mus pw rau ntawm taw ntaiv, txuas ntxiv mus ces los pw rau ntawm kuv taw rooj ntawm qhov rooj ib sab lawm xwb. kuv muab nws lawv kom nws mus pw rau hauv qab taw ntaiv uas twb pua chaw rau hauv lawm los nws mus kiag ib ntsis xwb rov qab hlo los lawm li. Nws pheej ua li nws xav los nrog kuv pw hauv txaj. Thaum kuv tau zaub mov kuv kuj qee li ib qhov tseg rau tus maum Aub ntawd noj thiab. Tus maum Aub no nws yog ib tug Aub uas tsis loj, muaj ntsis me tsem tsawv, nws tsis tom tib neeg hlo li. Tus Aub no nws ua zoo nkaus li uas nws yog tib neeg es nws tsis yog Aub. Tus maum Aub no muaj tej hnub mas cia li tsis pom nws hlo li lawm, tej zaum nws kuj ploj mus tau li 2-3 hnub mas mam li pom nws rov qab los. Ua li no los txog rau hnub uas kuv ua hauj sam li. Nws yog xyoo uas peb cov hmoob nyob rau hauv vaj loog tsua yuav tau tuaj mus txawv teb chaws ces kuv thiaj li tau txiav txim siab los mus lees ua hauj sam ua zaum kawg. Ces muaj ib hnub kuv tab tom mus ywg dej rau txiv luam phoj cov tshuaj thiab yub ntoo ntawd ces txawm muaj ib tug hauj sam nws los hais rau kuv tias...koj mus sau npe es npaj yuav mus ua hauj sam nawb no ces nws txawm mus lawm. Ces kuv ywg tshuaj thiab yub ntoo tas nrho xwb, kuv saib na has ua cas pom tus mlom Vaj ntxwv Thaib ( Statue of the king ) ntawd nws ci ntsa daj rhuv li nws yog kub. Ces kuv saib ntev kwv yees li 5 feeb ntau xwb, ces kuv txawm cia li dhia dhia mus sau npe ua hauj sam tas ces rov qab los saib dua no na has ua cas tsis pom daj li qhov qub lawm, nws yog dub lawm xwb. Ces kuv thiaj li tau nrog lawv mus ua kev cai hauj sam thiab tau nrog lawv mus thub doos li ib lub hlis nkaus. Thaum kuv rov qab los txog tsev ces kuv mus qhib chav dej siv no na ua cas pom tus maum Aub los mus pw nyob rau hauv chav dej thiab nws yuag yuag heev li lawm, twb pom tav tas li lawm. Ua rau kuv poob siab nthav kuv xav tias ua li cas es yuav zoo li no os. Thaum nws pom kuv los ces nws mam li sawv mus lawm xwb. Zoo li nws yeej tsis noj dab tsi los mus tau ib hlis ntawd li thiab zoo nkaus li nws tsuas pw ntawd tsis mus qhov twg hlo li. Mas nws yog ib qhov uas txawv heev rau kuv thiab nws yog ib qhov uas txaus hlub heev li. Zoo li nws paub tias kuv mus lawm ces nws yuav ua tus zov tsev, tej no yeej tsis tau muaj leej twg cob qhia kom nws ua li no rau kuv. Ces kuv mam li muab mov muab nqaij rau nws noj, nws mam li pib muaj zog li qhov qub. Muaj ib hmo kuv tseem pw nyob rau tim tsev hauj sam lawv rov qab los ua npau suav rau kuv dua. Muaj ib tug tib neeg mas nws nqa ib tug cwj taw ciaj thiab taw tuag, nws los ntsib kuv ces nws hais rau kuv hais tias kom kuv tsis txhob qhia cov lus no rau leej twg paub no. Ces kuv nug nws hais tias ua li koj yog leej twg? Ces nws teb kuv hais tias...kuv yog tus uas nrog koj nyob ua ke tas li. Ces kuv xav zoj hauv siab tias Ab! twb tsis muaj leej twg nrog kuv ua ke tas li mab no. Ntshe nyob tsam nws ho lam yog tus maum Aub ntawd xwb laub...